政情：搞搞政：甘威做騷做全套

仲有幾個月就係區議會選舉，今年競爭激烈程度超乎以往，抓緊時間同機會曝光係一大要訣。港鐵上環站尋日起暫時封站兩日，港島西區居民出入唔多唔少都受到影響，白鴿黨嘅甘乃威因為「好感事件」形象受損，尋日就急急跟進上環封站首日運作補飛，仲約定傳媒添，整個安排冇乜驚喜，但就畀人做騷做全套嘅感覺！

甘乃威事先張揚話佢尋日朝早十點會去上環站外視察，佢未夠十點就現身，現場傳媒一擁而上，但甘威話要睇多五分鐘先答問題喎。等咗一陣，人齊啲、多啲，甘威講嘅卻係到場前行過上環一帶，滿意秩序情況，然後就忙住企定定被攝記影相。

但金鐘站係港鐵嘅交通樞紐，最有可能出亂子，點解甘乃威唔去金鐘站睇吓先呢？佢冇答會唔會去，到採訪工作差唔多時，佢先至突然決定增加視察行程，搭免費接駁巴士去金鐘站，親身體驗接駁交通安排喎。根據區議會選區劃界，甘乃威屬於上環選區，唔安排落金鐘站視察都好難怪佢，但佢作為港島區立法會議員，港島嘅事務都責無旁貸噃。