政情：戴健文或執死雞做廣播處長

政府呢個熱廚房唔易搵人，一向麻煩多多嘅香港電台招聘廣播處長多時，但到家吓都難產。近日有傳，喺幾個被視為有機接棒嘅人都變為不可能之後，本嚟機會唔大嘅署理副處長戴健文行情開始看漲，分分鐘變做翻版蘇錦樑，即揀無可揀執死雞囉。

廣播處處長一職舊年十二月已經開始招聘，遴選名單包括某傳媒集團高層、前政務司司長許仕仁嘅新聞秘書關鄭麗敏等，但有關人士都冇成事，大冷之選嘅戴健文成為唯一之選。據聞政府做出呢個決定都好無奈，皆因戴健文本身一直都被視為兩位前廣播處長張敏儀同朱培慶呢啲前朝嘅嫡系人物，政府當然唔想搵番港台人管住呢個獨立王國啦！

雖然萬分不願，但亦無奈接受，始終廣播處處長個位唔可以長期懸空，加上港台每個變動都有機會觸發政治危機，故此就算政府點唔想都好，都一定要搵個正式處長返嚟，所以戴健文有機會步佢上司蘇錦樑後塵執死雞。咁戴嘅委任會唔會導致港台獨立王國重臨呢？依家嘅港台已經唔會好似以前咁自由，又有個太上皇顧問委員會(目及)住，冇咁易啩。