政情：孫公展歌喉為畢業生打氣
暑假係青少年嘅世界，尋日約二百個中七畢業生齊齊出席「太陽計劃2011永不放棄同學會畢業典禮」活動，教育局局長孫明揚親身出席外，仲喺活動上大展歌喉，唱咗兩首英文歌，為一班中七畢業生打打氣，搞到班後生仔個個o依嘩鬼叫、拍爛手掌。
呢個活動好有意義，大部分畀主持請上台分享個人心得嘅畢業生，都講講吓喊到收唔到聲，搞到節目超時，但孫公都一路好有耐性等候。去到尾聲，主持人邀請孫公上台一齊唱英文歌，孫公都好大方，原本大會只係安排孫公唱一首，點知孫公竟然自動波唱多首，兩隻歌分別係《Do-Re-Mi》及《Edelweiss》。現場所見，孫公啲歌喉都唔錯，佢尋日獻技嘅兩首歌都有超過四十年歷史，雖然班學生覺得陌生啲，但對孫公嘅歌喉就報以熱烈掌聲！
孫明揚全情投入唱歌，好多學生都陪佢一齊唱！