政情：美買家60萬奪李小龍長衫
一代國際武打巨星李小龍嘅十三件珍貴遺物尋日喺本港公開拍賣，拍賣總額近一百八十萬元，今次亦係首次同類活動，除咗本地嘅龍迷外，連遠在美國嘅買家亦專程來港搶購。
李小龍喺電影《死亡遊戲》試鏡時，曾經着過一件深藍色毛皮襯裡中國式長外套，就由美國買家Greg Manning用六十萬港元投得。佢話好鍾意睇《死亡遊戲》，今次投到件衫好開心。
本地薑方面，美聯物業副主席黃錦康就用咗近三十萬元投得五件心頭好，佢最鍾意李小龍生前「以有限為無限」嘅座右銘，所以用咗二十萬元投得李小龍親筆簽署嘅振藩國術館學生會員卡。佢解釋話，截拳道係李小龍獨創嘅武術概念，卡片上印咗截拳道嘅陰陽標誌同座右銘「無方法為方法，無限制為限制。」
美國買家Greg Manning（右）用六十萬港元投得李小龍喺電影《死亡遊戲》試鏡時着過嘅長外套。