政情：許漢忠狂踩高鐵

港府同機管局正就香港機場係咪興建第三條跑道諮詢公眾，機管局行政總裁許漢忠早排四出推銷。尋日佢又喺一個電台節目上做說客，不過，有參加節目嘅青年挑戰佢，話本港已經起緊高鐵，勢必分走一批航空乘客，質疑第三條跑道嘅成效，許漢忠聽罷毫不客氣咁話：「高鐵成效不彰！」直指高鐵對航空嘅威脅好小。

自從溫州段高鐵發生7．23事故之後，中港居民都對高鐵信心動搖，內地居民出遊開始回歸航空，本港都有唔少挑戰當年高鐵撥款嘅聲音。正所謂一沉百踩，許漢忠尋日踩高鐵、捧航空，亦可以話符合佢嘅身份，更符合拓展航空嘅發展策略。

只會影響短途客

許漢忠尋日話到明：「就算短途客去晒內地，都係佔本地客量嘅百分之三，我哋大部分都係國際航班，同高鐵無關係，亦唔存在替代性。」意思係高鐵喺內地嘅經驗發現，只有短途客、即飛機航程係兩個鐘頭以下嘅先會受影響；而且，香港機場嘅短途客唔係全部去內地，就算計晒佢哋去內地，機管局都計算過影響性唔大。

高鐵不足懼，青年們又質疑鄰近本港嘅內地城市有多個機場，且航線不斷增加等，許漢忠不厭其煩一一解答，講晒一句就係香港競爭力強勁，有信心新跑道達到經濟效益。有青年忽發奇想問佢有冇諗過第四、或第五條跑道，許漢忠話：「我諗等十年都未有社會共識呀，依家起多一條已差不多到頂點！」似乎呢個推銷員都覺得唔易做。