淫媒抄襲斷正 多行不義自斃

人在做，天在看，多行不義必自斃，真係一啲都冇講錯，呢，睇吓壹淫媒就知喇！

壹傳媒旗下「蘋果動新聞」網站嘅「壹傳媒互動有限公司」，因屢次抄襲東方報業集團旗艦網站嘅新聞而被海關刑事檢控，尋日喺東區法院承認八項侵犯版權罪，每罪判罰五千共罰款四萬元，並留有案底，成為本港首宗傳媒機構因抄襲新聞而被定罪嘅案例。叮，淫賤黎話咁易又創造咗一項歷史喇，可惜係污糟邋遢嘅歷史！

話時話，壹淫媒本來被票控三十三項侵權罪o架，點解最後只有八宗罪成呢？點解其餘二十五宗獲撤銷起訴呢？正如城市大學專業進修學院學術統籌宋立功質疑，檢控毫無準則，令人覺得「唔理解、唔公平、唔明白」。查實，就蘋果網抄襲東方旗艦網站三十三則新聞，東方報業兩年半前已入稟高院民事索償，官司擾攘到上月七日，壹淫媒先至向法庭繳款一百萬元求和，咁即係認衰喇，當局告啲唔告啲，令人莫名其妙。

正所謂，一次成無賴，永遠係無賴，壹淫媒誨淫誨盜，好似呢啲抄襲新聞、侵犯版權嘅劣迹，其實早就厚過電話簿嘅喇。太一叮不妨同大家重溫吓歷史，○五年三月十五日，有一單譚姓一家四口食咗毒帶子不適送院嘅新聞，其中一張刊登於《東方日報》頭版嘅獨家照片，竟然被《蘋果日報》、《星島日報》、《成報》及《東周刊》等多間傳媒盜用，東方即刻向涉案傳媒機構以及相關記者採取法律行動，由於鐵證如山，包括《蘋果日報》在內嘅相關傳媒紛紛向東方賠償求和。

事實證明，壹淫媒毫無職業道德可言，為達目的，不擇手段，偷新聞只係小兒科咋，作新聞仲拿手呀。當年，《蘋果日報》為咗炮製所謂獨家新聞，竟以五千元利誘啱啱發生家庭倫常慘劇嘅陳健康北上表演喪盡天良嘅尋歡騷，惹來全城怒罵，淫賤黎卒之要刊登全版啟事道歉一番。不過咁，道歉歸道歉，淫賤不能移，壹淫媒唔只繼續誨淫誨盜，仲變本加厲添吖，偷入明星酒店房間、摷明星垃圾桶、偷拍女藝人換衫、賣弄未成年少女濕身照……簡直無所不用其極。

唉，一從大地起風雷，便有精生白骨堆。本港傳媒生態一向非常健康，大家安分守己，良性競爭，從來唔會發生呢啲不問自取、不勞而獲嘅侵權醜聞，但自從壹淫媒出現之後，成個傳媒生態就變成烏煙瘴氣，亂七八糟。仲有吖，淫賤黎攪亂香港不特止，連台灣亦唔放過，佢去咗嗰邊冇幾耐之嘛，成個寶島就被佢嘅腥色羶攻陷，搞到民間團體群起抗議，淫賤黎淪為過街老鼠。

都係古人講得啱，纖纖不伐，必成妖孽。淫賤黎為禍香港，為禍台灣，甚至為禍大陸，歸根究柢都係因為港府為虎作倀，姑息養奸。餘孽妖孽，蛇鼠一窩，香港有運行至奇喇，叮！