政情：證券業協會下月換主席

唔經唔覺，證券業協會主席李耀榮兩年任期快到，需要轉莊。依家該會有三個副主席，分別係嘉信控股董事及總經理馮煒能、招商證券董事繆英源同東英亞洲證券董事陳立德。至於邊個會升呢出任主席，抑或爆冷由空降出任，下月自會揭曉。

證券業協會係本地最大證券經紀組織，但近年風頭有被其他會蓋過之勢。因為論出位程度，肯定唔及以示威揚名、以王國安為首嘅證券及期貨專業總會；近年又有實力雄厚，迅速冒起嘅生力軍加入，即係中資證券業協會。此外，其他證券組織亦都好積極參與業界關注嘅議題，好似近期業界非常關注嘅黑池事件，七個經紀會就一齊討論，準備聯手向政府同監管機構施壓，增加聲勢。

不過，有證券界人士講，由於證券業協會始終係最大經紀會，政府仍然好重視佢哋嘅意見。