政情：搞搞政：平叔狂數港人公交醜態

近排有外國傳媒數臭港人坐公共交通工具嘅十大醜態，估唔到外號「庸官殺手」嘅前高官王永平都有共鳴。平叔日前喺電台節目上批評，港府猛推國民教育，後生仔淨係識唱國歌，但就唔識得守規矩、尊重長者，好似搭車唔會讓座，而且仲一人霸兩個位，倒不如先搞好公民教育好過。

點解咁㷫？原來佢有切身體驗，佢話自從退休後冇政府車坐，變成一個冇車階級，巴士、小巴、港鐵乜都會搭，經常喺車廂內困獸鬥，乘客唔肯行入啲嘅情況，令佢印象深刻。佢又話最睇唔過眼就係啲後生仔女唔識讓座，有長者訴苦話有時寧願先坐去總站上車，以便有位坐。

其實，平叔唔使好似發現新大陸咁啫，呢啲醜態存在已久，可能佢以前坐政府車舒服慣唔知道啫。