政情：馬明哲膺A股最高薪CEO

《福布斯》尋日發布「2011年中國上市公司CEO薪酬榜單」，已經進入高薪時代嘅A股，近年多咗好多年薪過百萬元嘅CEO。人工最高係中國平安CEO馬明哲，年薪達987萬人民幣。但如果計埋「本是同根生」嘅中資股，又點同聯想集團CEO楊元慶嘅7,872萬港元比呢？差成七倍咁滯呀！

根據《福布斯》嘅統計，A股年薪過百萬嘅CEO共有二百三十二人，當中民企CEO比例仲未過半，但年薪最高嘅榜首就由非國企嘅平安CEO馬明哲奪得，而排第二、三名嘅，係嚟自證券同銀行界，可見金融業喺高薪行業享有「壟斷」地位。

至於A股國企人工最高嘅係華銳風電總裁韓俊良，有成858萬元人民幣㗎！講到「高薪」二字，對國企嚟講一定會有爭議。但《福布斯》就話剔除今年至掛牌嘅華銳風電，攞到百萬元年薪嘅一百二十名國企CEO，喺去年幫公司贏到33%營業額增長，以及47%純利增長，明顯係好過民企CEO。

之不過拍埋非國有上市公司度，唔單止楊元慶贏咗幾條街，人和商業總裁戴永革嘅6,745萬港元年薪、恒大地產總裁夏海鈞嘅4,795萬港元年薪，都係A股CEO望塵莫及嘅。