病漢昏睡兩日避過冧天花

客廳冧天花，男子爛瞓避一劫！深水埗一個逾五十年樓齡的唐樓單位，假天花因天台滲水而甩皮甩骨，石屎時有剝落，惟獨居男戶主聲稱無錢維修懶得理，兩日前他服藥後「大昏迷」，瞓足兩日，至昨晨肚餓始起床，驚見客廳似爆炸後災場，數百磅天花倒冧，家電壓爛，因逃生無門需由消防員打救，他自嘲:「好彩爛瞓，否則留喺客廳命都冇。」

現場醫局街一個頂層唐樓單位，面積二百多平方呎，該幢舊樓已有五十五年樓齡，戶主姓陳（四十四歲），於「沙士」樓市低殘時，以三十六萬元購入獨居。據悉，陳早年經營清潔公司，承包酒樓清潔，生意不俗，惟有人沉迷賭博，終輸掉身家，還欠落周身債，數年前破產，因情緒低落需服藥治療。

陳表示，上周已發現天花板冧了一塊拳頭般大石屎，滿以為樓宇殘舊所致，不以為意。本周二，陳服藥後「大昏迷」，期間，客廳傳出巨響，惟因藥力影響，他照睡懶理。至昨晨九時，陳瞓足兩日後，因肚餓起床，驚見客廳假天花連同石屎倒冧，傢俬及冷氣機被壓毀，他以為冧樓，因大門被瓦礫及雜物頂着，逃生無門，只好報警求救，由消防員將假天花殘骸推開，陳始能解困。

塌下石屎重數百磅

屋宇署人員其後到場調查，證實該幅假天花由木板裝嵌，面積約三米乘三米，連同塌下石屎約重數百磅，而天花頂鋼筋外露，塌下的假天花亦有水漬，懷疑大廈殘舊漏水，天花頂鋼筋受水浸生銹，導致石屎鬆脫肇禍，初步檢驗相信肇事單位無結構危險，已發出修葺令，要求業主盡快維修。但為保安全，建議陳由社署安排暫時搬出。

「都算執番身彩，如果留喺廳度命都冇！」事後陳猶有餘悸說，並指購入單位後從無維修，假天花裝嵌多久亦不知，該單位樓上是天台，過往曾以瀝青鋪天台防水，他慨嘆因經濟拮据，無錢維修，極感徬徨。