巡查劏房慢過龜 遲鈍屋署官能低

屋宇署近期可以話係屋漏兼逢連夜雨，又有僭建，又有劏房，長期疏懶積落嘅樓宇安全炸彈爆完一個又一個。尤其係劏房安全問題，早前土瓜灣唐樓奪命大火震撼全港，就係呢種十字豆腐嘅港式貧民窟埋下禍根。於是咯喎，屋宇署急急補鑊，矢言加強巡查。

好嘞，屋宇署補鑊補成點呢？嗱嗱嗱，屋宇署近日聯同警方「破門入屋」巡視土瓜灣兩個劏房單位，都幾係威係勢o架。今次係當局歷來第二次運用呢個權力，咁少出動撒手鐧，係咪即係表示屋宇署嘅巡查行動好順利呀？好可惜，事實又「笨」唔係咁喎。

即係咁，屋宇署為針對劏房問題，由四月起擴大執法範圍，目標係一年內檢查一百五十幢樓宇，涉及一千三百間劏房。至今有乜嘢成績呢？登登凳，答案係：成功巡查嘅劏房只有一百零四間，僅佔巡查目標數目嘅百分之八！

有冇搞錯？劏房安全問題十萬火急，一場大火隨時死傷枕藉，屋宇署用咗三個半月，竟然只係成功巡查咗唔夠一成嘅劏房，試問聲，咁算唔算民急官唔急？港府龜速查劏房，又算唔算漠視危機、敷衍塞責？喂喂喂，唔好唔記得，根據官方數據，本港五十年高齡舊樓，正以每年約五百幢嘅速度增加，屋宇署咁樣巡查法，何止杯水車薪，簡直係滴水車薪！

屋宇署有乜解釋呢？港產官僚今次賴執法存在困難，佢哋話喎，三個半月巡查嘅四十八幢大廈中，尚有一百八十二個單位未能入屋，估計涉及超過六百個劏房咁話。屋宇署仲承諾下半年增加人手巡查，同埋建議下年度修例，以後可以向法庭申請手令入屋巡查。

咁就奇嘞，劏房問題亂七八糟，好多設計都牴觸法例，唔係今時今日先至存在，單位業主千方百計令巡查人員食閉門羹，呢樣亦係學生哥都諗到。屋宇署依家先至好似如夢初醒，發現執法困難喎，究竟係反應遲鈍吖，定係以前根本無認真執法呢？由此可見，官僚能力相當低，唔怪得巡查劏房進度慢過龜爬啦！

話時話，遲到好過無到，遲來嘅補鑊總好過有鑊唔去補嘅。不過，太一叮再次提醒港府，補鑊都要快手啲吖，劏房安全問題刻不容緩，唔理你加派人手巡查又好，申請法庭手令入屋又好，就算扮財神氹屋主開門又好，總之要加快巡查速度，唔係咯喎，萬一劏房危機又搞出人命，屋宇署隨時被人拆招牌都似，叮！