政情：袁莎妮任總商會CEO
做咗近二十年政務官嘅袁莎妮（Shirley），獲香港總商會董事會通過出任總裁，接方志偉班，本月八日履新。但有商會內部人士批評，總裁嘅遴選過程欠缺透明度。
總商會主席胡定旭接受查詢時回應話，佢哋係先由主席委員會物色合適人選，然後推薦畀董事會，再由董事會投票決定，過程公開透明。據商會消息人士指，Shirley係商會成立一百五十年來嘅第四位CEO，商會並無聘請CEO嘅既定程序。
Shirley喺牛津大學一級榮譽畢業，九一年加入政府，唐英年加入政府做工商及科技局局長，Shirley係唐唐嘅政務助理，之後唐唐做財政司司長都帶埋Shirley過檔。雖然佢被認為係唐唐愛將，但最終去年九月離開政府。
袁莎妮