政情：搞搞政：林健鋒追煲呔曾減稅

剩低唔夠一年任期嘅煲呔曾已經進入等收工階段，由佢身上，香港人再次睇到乜嘢叫講得口響、做就冇影。尋日煲呔曾就今年施政報告諮詢本港政協委員嘅意見，商界嘅林健鋒就再次追瘦佢，問佢○七年競選時承諾過將本港利得稅降至百分之十五，依家會點落實？但煲呔曾好奸狡，一早話明只聽唔講。

林健鋒之前都喺其他場合追過煲呔曾，問佢幾時先減稅？佢死都唔肯放棄煲呔曾呢個○七年到依家都冇影嘅承諾。除咗呢項，佢仲質疑政府嘅諮詢工作太草率，話政府周不時做啲「搬字過紙、人有我有嘅諮詢」，呢啲所謂諮詢既冇了解香港嘅實際情況，又缺乏民間推廣，希望第日可以做啲徹底嘅諮詢。

啲政協提咗唔少意見，講咗足足一個半鐘頭，但煲呔曾就話之你，冇回應、冇表態。據聞，煲呔曾起初都賣口乖話多謝大家畀意見，但講到尾聲就突然「變臉」，話喺出面有好多記者，大家可以就自己嘅言論暢所欲言，但就唔好轉述其他人，包括佢嘅說話，費事大家引述時有出入喎！佢連自己嘅承諾都講完就算，有乜資格去追究人哋呀？