政情：李國寶調位博出貓

立法會暑假後可唔可以順利搬入添馬艦新大樓仲係未知之數，不過，啲議員編位嘅糾紛傳個不停，繼五散人有成員因為同人民力量坐得太近，要搵老友調位外，立法會出晒名「三點不露」嘅大懶蟲李國寶都傳出調位消息，不過，佢唔係因為求清靜，而係有戰略意義，據講佢要坐近同陣營嘅黃宜弘，以便了解人哋點投票，佢呢招算抄襲定係參考呢？

李國寶喺立法會出席率偏低係人都知，估唔到搬位都搬出大頭佛，仲要調完一次又一次，真係服咗佢！

坐近黃宜弘「參考」投票

兩個禮拜前，我哋已經披露過立法會新大樓嘅座位表，原本李國寶同霍震霆兩個大懶蟲被編配坐埋一齊，但係走堂經驗豐富嘅李國寶卻要求同詹培忠調位，點解？因為兩張空櫈拍埋一齊，真係好礙眼兼出醜。

巧花心思調咗位之後，又有新問題。近日，李國寶又要求同坐喺佢隔籬嘅旅遊界謝偉俊（Paul）調位，咁樣一調，佢就可以同中總嘅黃宜弘坐埋一齊，佢兩個依家都坐埋一齊，唔通李國寶同黃宜弘坐出感情，去到新大樓都一定要黐埋一齊？

阿Paul透露，李國寶喺一星期前同佢提出呢個要求，據講，佢希望坐近啲黃宜弘，以便問對方應該點投票，加上佢哋兩個本來就係老友嘛。李國寶開聲後，幾日前，連黃宜弘都搵阿Paul斟斟呢件事，人哋「情投意合」，阿Paul惟有玉成其事答應同李國寶互調座位。

睇吓新座位表，就知道李國寶調位之後，右邊係民主黨黃成智、左邊係阿Paul，黃成智屬泛民主派，阿Paul投票又無定向風，所以李國寶惟有一遷再遷囉。