左眼右眼分不清 醫你唔死算大命

以前如果話香港醫生左右不分，可能好多人唔信，但一次係咁，兩次係咁，次次都係咁，就唔到你唔信喇。正如內地庸官話齋，不管你信不信，我反正是信了。

呢，一位左眼患白內障嘅病人喺公立醫院做手術，醫生明明喺左眼畫咗記號，但唔知點解居然擺咗個大烏龍，喺病人右眼打麻醉針，好彩上級醫生及時到場糾正，唔係就大鑊咯。

打錯麻醉針仲未算誇張，睇吓醫管局最新嗰期《風險通報》，事故無奇不有，匪夷所思，咁先至嚇死你吖。有人做完手術體內多咗塊紗布，需要捱多刀攞番出嚟；有位社康護士上門幫老人家插尿喉檢查，結果居然入錯屋，搞到另外一位冇事嘅婆婆無辜被插。唉，淨係今年第一季，公立醫院就有三十五宗醫療事故，問你怕未。睇嚟唔止醫生左右不分，成個公共醫療系統都迷失咗方向，醫人變成害人，救人變成殺人。

食物及衞生局局長周一嶽循例出嚟補鑊，話事故可以避免，唔應該發生，醫護人員應該盡量減低出錯機會喎。講真呀，呢類官話廢話大家已經聽到反胃，每逢發生醫療事故，次次都話係個別事件，次次都話唔應該發生，次次都話要改善，到頭來咪又係得個講字，唔應該發生嘅繼續發生，應該改善嘅繼續冇改善，叮！

正如有人話齋，今時今日，公立醫院已經變成閻王殿，病人受盡折磨，同落地獄冇乜分別嘅咋，醫你唔死算你命大。

講起左右不分嘅鬧劇，公立醫院唔係第一次發生，甚至唔係第二次，而係三番四次嘅喇，左腳當右腳，右手當左手，左牙當右牙，乜都試過。最慘係一位左肺積水嘅病人，喺公立醫院進行穿刺抽積水手術，點知醫生一刀刺落病人右肺，搞到右肺肺尖出現氣胸，唔醫猶自可，醫完更大鑊。仲有啊，沙田富山公眾殮房曾經將一位毋須解剖嘅女死者劏開，而本應解剖嘅男死者就原封不動，唔止左右不分，連男女都不分，你話係咪吹脹吖？

太一叮思疑，公立醫院錯得咁離譜，可能係醫生冇讀過通識科啩。睇嚟醫管局有必要開番個課程，聘請幼稚園教師幫醫生護士補吓課，教曉佢哋何謂前後左右，何謂男女老少。當然，第一個要補課就係每周一鑊嘅周一嶽，叮！