初為人母嘅聯合國兒童基金香港委員會主席陳晴（Judy）尋日出席國際母乳哺育周活動時現身說法，對本地母乳餵哺嘅配套設施有唔少睇法，希望老闆們可以體諒，額外增加員工嘅產假。
Judy嘅囝囝已經八個月大，依家一半母乳加一半糊仔，咁好營養，難怪囝囝已經有二十二磅重。講起當初母乳育嬰時，Judy記得囝囝啱啱滿月，佢就要出去開會，當時真係心情囉囉攣，因為要趕返屋企餵奶，雖然好辛苦，但佢亦好享受呢種愛嘅交流，仲覺得送咗一份好好嘅禮物畀囝囝添！
陳晴堅持母乳育嬰，縱使辛苦都甘之如飴。
