政情：物業升值導演會搬大竇
樓市好景，好多以前買落嘅物業都升晒值，由一班香港導演組成嘅導演會尋日正式搬竇，由原本嘅何文田會址，遷往牛頭角，新竇比舊嗰個大好多，導演會會長爾冬陞、劉偉強及張同祖都有出席新會址入伙儀式。
導演會新址比以前嘅會址大成四至五倍，一班導演聚腳更鬆動，開大會都唔使驚喇。爾冬陞同劉偉強接受訪問時透露，何文田嘅舊會址因為單位售價理想，佢哋亦可以購入較大嘅牛頭角單位，咁都未算，仲有餘錢可以成立基金添，賣個舊址可以做到咁多嘢，難怪幾個大導咁開心喇。
講到佢哋個基金，原來係用嚟開設研討會及訓練班等，以便培育新一代嘅香港導演，為呢行培育更多新血。
導演會細屋搬大屋，爾冬陞（右）同劉偉強飲得杯落。