政情：演講照稿讀梁卓偉死撐

演講係從政者必備嘅技巧之一，不過，特區官員好多時演講都係照稿讀，食物及衞生局副局長梁卓偉（Gabriel）被視為副局中比較出位嘅一個，對於演講，都係力撐照本宣科式，即係抓住稿、好似傳聖旨咁讀。點解？佢梗係唔認官員無能，反而「死雞撐飯蓋」賴新聞官啦。

梁卓偉話，佢以前以教授身份演說時都係自由發揮，做咗官就唔敢囉。有新聞官同佢講，如果唔跟講稿演說五分鐘，佢哋就要用半個鐘先至出得到演說嘅全文，如果過咗凌晨夜一夜先出到新聞稿嘅話，就會畀傳媒話喎。至於喺台上可唔可以靈活啲？佢就以出席施政報告諮詢會為例，話曾經有政黨代表同佢講，行來行去講嘢，會令大家無法將個鏡頭對住佢影喎。

佢嘅意思即係官員演講硬繃繃唔關佢哋事，不過，睇吓同佢出席同一場合嘅哈佛教授迪恩．威廉姆斯尋日喺全程無演講稿嘅情況下，企喺台上就「何謂真正嘅領袖」發表咗大半小時演說，真正我口講我心，呢啲就叫功力喇！