政情：新立會記者室裝CCTV捱轟

添馬艦立法會新大樓可唔可以準時入伙仲未知，但記者室裝設閉路電視一事卻鬧出小風波，仲惹嚟議員同傳媒行家非議添，有新聞團體更去信立法會表達關注，認為會令記者做嘢有心理障礙，妨礙新聞自由。

依家喺中環嘅立法會舊大樓，記者室並冇裝任何攝錄器材，新猷唔多唔少引嚟一啲憂慮，事關私隱嘛，團體仲要求立即拆除添。

不過，話分兩頭，舊大樓記者室過去出過唔少事，緊要嘅包括有女記者涉嫌被非禮、攝影記者唔見咗幾萬蚊嘅鏡頭，輕嘅又有記者唔見錄音筆，甚至一盒豬排飯都可以遺失。咁多失竊案件，搞到立法會秘書處研究喺記者室門口加裝閉路電視，裝咗之後，又好似少咗事發生。點都好，件事已經廣為關注，行管會主席已經講咗，會聽取傳媒及立法會保安顧問嘅意見。