政情：扮勁變沙包 煲呔曾遭圍揪

港澳辦主任王光亞大彈香港管治問題後，煲呔曾一直龜縮冇回應，尋日終於搵到個舞台，喺智經研究中心搞嘅「領袖論壇2011」上大講佢嘅領袖之道，會後又即席回應王光亞嘅說話，本嚟呢個安排好好，可惜煲呔曾嘅領袖之道太缺乏說服力，佢呢頭講完，嗰頭已經畀人揪番轉頭，新民黨嘅田北辰、公文袋嘅陳淑莊都開火即場批評佢，結果一個絢麗嘅舞台就變咗圍插煲呔曾嘅平台。

面皮厚互笠高帽

係人都知智經同煲呔曾關係密切，正當王光亞大鬧煲呔曾政府管治能力低時，智經竟然搞咗個論壇，曾蔭權梗係善加利用，仲好識做咁喺論壇上向智經大派高帽，一向親疏有別、慣咗偏聽嘅煲呔曾話，智經係本地公共政策研究方面嘅領袖。跟住佢懶幽默咁話，近來有好多關於佢治港風格嘅說法，有人可能係話智經中心真係包容，竟然邀請佢去演講，佢就認為：「也許這正好表現智經洞察力和客觀態度。」

連佢自己都覺得有機構呢個時候請佢演講係包容，足見煲呔曾心中有愧啦。但佢勝在面皮厚，轉過頭已經畀頂高帽人，一於將笠高帽活動進行到底。

不過，佢嘅如意算盤就畀在座嘅嘉賓打爛咗，煲呔曾呢頭發表完成千幾字嘅演講後，嗰頭就畀政黨同參加論壇嘅人士批評，話題亦集中於佢嘅領袖之風得把口，有人批佢講得多、做得少，長遠問題更加冇樣落實過；亦有人認為政府嘅管治出咗大問題，大家你一言我一語，圍插邊個就唔使開名喇。

等收工嘅煲呔曾尋日都酸咪咪咁話，下屆特首嘅選舉喺未來九個月會成為城中熱話，「我嘅時間係有限嘅」，言語中對權位嘅戀棧，真係遮都遮唔到。