後生真可畏 德育太失敗

邊個話香港青少年做人冇目標，做嘢冇耐性，唔捱得苦o架？睇過尋日動漫電玩節開幕嗰種墟冚場面，包你對呢班未來主人翁改觀，甚至可能要寫個服字。

講起真係大陣仗。展覽未揭幕，場外已經有幾千人等候，排頭位嘅後生仔足足排咗九日，可謂其志可嘉。佢哋捱更抵夜，目標只有一個：買限量版公仔。有人甚至用幾十蚊時薪，請一百幾十人幫自己排隊，問你服未！

目標明確，熱情有加，不辭勞苦，如果青少年將呢啲精力用喺讀書方面，為人父母嘅一定開心到暈喇。

話時話，放暑假輕鬆吓，柴娃娃去動漫節買心頭好或者開吓眼界，對年輕人嚟講都好正常嘅。之但係，凡事適可而止好喇，物質追求永無止境，如果不顧一切，不擇手段，好容易誤入歧途不可自拔，到時悔恨就遲嘞。

呢，警方早排打擊「網上援交」，拘捕咗多名青少年，其中一名十四歲女童除咗自己接客，仲涉嫌做埋淫媒，操控「童男童女」賣淫；更有一名十三歲男童甘願做埋「鴨仔」添，真係令人難以置信。

警方發現，犯罪集團利用年輕人「搵快錢」心態，喺網上以「超筍」暑期工廣告誘騙青少年應徵，然後威逼利誘，要佢哋就範。事實證明，援交問題趨向低齡化同網絡化，青少年稍一不慎隨時墮入圈套。

本港青少年問題其實早已響起警號，吸毒、援交、搶劫一類案件周不時發生。最可怕嘅唔係個別人嘅品德出咗問題，而係家陣嘅青少年普遍沉迷於金錢物欲，令不法之徒有機可乘。

早排有項針對學生嘅調查發現，一切向錢看嘅情況相當普遍，六成四受訪者承認生活上會為金錢煩惱，近四成認同「忠忠直直，終須乞食」，更有兩成人覺得，只要唔傷天害理，就算用唔合法嘅方法搵錢，都可以接受。

最得人驚嘅係，有咁樣諗法嘅唔係有書唔讀、流連街頭嘅「邊青」，而係包括唔少成績優秀嘅「九十後」學生。十年樹木，百年樹人，青少年問題多多，可見本港教育制度幾咁失敗。

無計喇，當局嘅所謂教育改革罔顧實際，愈改愈差，愈改愈亂，學生無所適從慘變白老鼠，智育都未掂，德育更加唔使諗。計太一叮話齋，咁嘅環境下，有幾多青少年可以拒絕功利誘惑，健康成長，唔使問都知答案啦。叮！