政情：王馨平做醜人阻爸爸飲酒
早前王馨平陪同爸爸王羽出席佢有份主演嘅電影首影禮，話呢個係爸爸嘅要求同心願，又話最難忘係首次同爸爸一齊行紅地氈。佢話：「因為佢拍戲時我好細個，到我拍戲時佢就做生意。好多人讚佢喺戲度做得好好，不過佢都好客氣咁話係人做呢個角色都會好，因為個角色好搶。」
佢又話爸爸當年主演嘅《獨臂刀》係一個傳奇。對於爸爸嘅健康狀況，佢以不俗嚟形容，但笑言有次去飯局時，見到爸爸面前有杯紅酒，即好惡咁責罵對方唔應該飲酒，又話：「爸爸話佢冇飲，但我知佢係唔會拒絕人，身邊親朋都讚我話得啱，要對佢惡啲！以前佢成日要應酬杯杯清，依家要戒酒，食得清淡啲。」
