政情：榮雪梅開微博巧遇舊友

久未露面嘅榮雪梅，前晚出席護膚品牌La Prairie活動，佢話呢兩年經常往返內地打理家族生意同埋到歐洲看顧兒子，所以少咗喺香港，又話雖然一直少上網，但早前開咗微博，因而巧遇失散咗二十幾年嘅童年朋友，兩人更約定喺四川相見。

榮雪梅笑言依家有少少微博癮，仲話：「微博令我知道中國人真正諗緊或關心啲咩。」有冇被河蟹呀？佢話：「未試過，如果唔公平嘅嘢都會寫吓，但我只係small potato，就算寫咗都冇人留意啦。不過只係一味鬧政府係冇用，都要提出好建議。」佢又話四川一行會見舊友外，仲會做一啲賑災活動，佢話：「我做過調查，我會親手畀錢有需要嘅家庭，對象係讀得書但冇經濟能力嘅人。」佢又話由於信唔過，所以唔會將善款交畀慈善機構。另外，佢喺微博上載出海泳衣照外，仲上載同老公嘅合照，並寫道：「願每一個夜晚都有您相伴！」