政情：富貴黨鍾嘉欣踩大舊地頭

富貴黨黨花、「政壇鍾嘉欣」Rainbow歐銘絲，雖然出道日子尚淺，但人氣一啲都唔弱，據該黨中人話，Rainbow形象正面兼討好，最重要係有野心喺政壇大展拳腳，所以極有機會喺年底區議會出戰荃灣區議會麗興選區，即係人民力量立法會議員「大舊」陳偉業嘅區議會選區。

新劃界涵蓋票倉

咪以為Rainbow咁夠膽去挑戰大舊呢個政壇老手，其實大舊早就明示或暗示好大機會唔再參選，人民力量會派出一名年輕成員接棒參選，希望保得住個議席，咁即係話Rainbow會同疑似大舊拗手瓜嘞！消息人士透露，初步評估Rainbow當選機會都唔細，除咗冇大舊呢個勁敵外，最大原因係呢個選區已經重新劃界，範圍多咗深井部分地方。

據聞該黨副主席周梁淑怡喺深井有好多支持者，而且同當地商戶稔熟，相信可以拉到唔少票喎，但呢個係該黨嘅內部評估，最終結果係點，當然要選過至知。