政情：銀公盧重興睇唔通股市
金融海嘯後，環球經濟立立亂，銀行家企喺風暴中央，財資部大班精英睇實個市，一樣睇唔通，盧重興尋日喺銀行公會例會之後接受記者提問，大家問到下半年點睇，佢仲好風趣咁話佢睇唔通，但又相信在座嘅記者下半年一定會睇到好多好精彩嘅發展。如果屬實，記者應該當佢呢句係「祝福」定係「詛咒」？
有記者問到金管局對銀行增加儲備要求，想知銀行界有乜嘢意見時，盧重興直接答「銀行公會唔管呢啲」。而銀公例會尋日開咗超過一個鐘，記者再冇問點解佢主持會議咁耐同傾咗乜嘢，因為對佢三年前同一個問題嘅答案記憶猶新，佢當年嘅答案係—「因為我講嘢慢」。
