政情：黃公公替死畀商家圍插

廠商會前晚舉行會董晚宴，主題為「港資企業在內地發展情況」，請咗商務及經濟發展局常秘「黃公公」黃灝玄做嘉賓，佢致辭講足二十分鐘有關特區政府為內地廠商提供咗乜嘢協助。去到答問環節，廠商會會董陳國民質問，點解唔講吓商界最關心嘅競爭法，狠批競爭法條文唔清唔楚，又認為競爭委員會有太大權力。

黃公公仲唔識死，嬉皮笑臉咁話唔知在場商界人士有興趣聽競爭法，如果早知，可以用多半粒鐘至一粒鐘講都得喎，又話競爭法委員會嘅訂定會提交立法會，再作公眾諮詢，叫大家唔好咁擔心。但陳國民唔收貨，再質疑如果委員會真係冇生殺大權，點解政府唔喺法例上寫清楚？最後仲話：「政府打唔到大老虎，就搵中小企開刀！」

另一會董沈運龍亦批評：「我知佢（煲呔曾）同地產商好老友，但就好仇商、仇視我哋啲商家呀！」佢又話中小企經歷金融海嘯，營商環境不斷變差，經營成本水漲船高：「到底政府明唔明乜嘢係休養生息？政府依家嘅做法等同亂開藥，病人唔死就假，仲死得快啲添！」

其實，黃公公係主管工商及旅遊科，而競爭法係局長蘇錦樑負責嘅，所以佢今次畀班會董狠批，可以講係做咗替死鬼，相信連佢都有啲錯愕。