政情：田二少自薦查溫州事故

溫州高鐵相撞事故搞到天怒人怨，溫總前日講明要徹查。新民黨副主席田北辰寫咗封信畀溫總自薦加入調查委員會，誓要查出邊個搞到車毀人亡。田二少話自己做過九鐵主席，又係全國人大代表，今次國家有難，出手係當仁不讓，又話今次自薦唔怕畀人話抽水，事關參加調查係要落手落腳做。

田二少話自從爆出溫州事故後，香港人對高鐵完全失去信心，日後高鐵香港段通車時，分分鐘冇人敢坐。佢話自己做過九鐵主席，算熟悉鐵路運作，一般涉及人命傷亡嘅交通事故，事後救援方程式應該係「救人、調查、通車」，但偏偏今次見到係「通車、通車、通車」，認為仲有內情未被揭發。

之不過，當年田二少仲係九鐵主席時爆出西門子事件，九鐵為免工程爛尾，要倒貼成億畀西門子，最尾搞到要行政總裁楊啟彥落台，九鐵高層又搞政變。如果田二少加入調查，唔知佢會唔會分享呢啲經驗畀其他人聽呢？