政情：馬雲讓步息支付寶風波
一場支付寶轉讓風波，令阿里巴巴集團馬雲、雅虎楊致遠同軟銀孫正義呢三個生意上好拍檔，差啲搞到友情破裂，但經過兩個幾月嘅溝通，尋日馬雲作出頗大嘅讓步，就係由馬雲全資揸旗嘅支付寶，將會繼續為阿里集團同相關公司提供電子支付服務，而阿里集團喺支付寶上市前後都會得到合理回報，換句話，亦保證咗阿里集團大股東雅虎同軟銀嘅持續收益。
睇番協議文件話，支付寶同阿里集團及其相關公司嘅合作關係仍然有效，而馬雲攞咗支付寶，亦會畀番阿里集團合理嘅回報，當中包括上市前每年支付寶及其子公司嘅49.9%利潤都會屬於阿里集團，而且上市時會畀阿里集團一次性現金回報，回報額為支付寶在上市時總市值嘅37.5%（以IPO價為準），相信回報額將唔少於20億美元，且唔超過60億美元。