政情：煲呔曾放迷煙拆彈又要拖

呢排全城關注外傭居港權司法覆核案件，有政黨更事先張揚一旦法官判外傭勝訴，勢將即時推高本港失業率，並對香港帶嚟嚴重嘅中長期經濟壓力。夕陽政府亦知衰唔敢怠慢，三番四次透過傳媒放風話呢個禮拜內行政會議將評估事件，更有消息指會召開特別行會討論事件。

雖則前晚曾一度傳出開會時間或有變數，但本港各大傳媒眼見此事事關重大，當然唔敢掉以輕心，尋日一早兵分兩路做好部署，一方面屯重兵喺政府總部靜候政府宣布重大決定，另一方面就準備咗形形色色嘅罐頭報道，諗住從多個角度深度闡釋若果外傭擁居港權嘅話，中長期對本港有乜重大影響。

外傭居港權擇日再議

殊不知夕陽政府五時花六時變，原定尋日早上舉行嘅行會會議突然流產。政府消息人士堅稱尋日係冇行會，又冇評論幾時會再開行會，令外傭居港權呢個全城關注嘅議題幾時再上議事日程成為一個謎。

老實講，眼見市民開始聚焦關心外傭有冇居港權嘅問題，煲呔曾非但冇第一時間撲出嚟講嘢釋除市民嘅疑慮，仲要好似細路仔玩泥沙咁，處理事件嘅方法真係唔應該。

有人估計，煲呔曾突然唔開行會同畀人一早踢爆幾時開行會有關，於是大玩「你估我唔到」嘅陰招，擇日再議；亦有人估計可能到臨開會前，政府內部都仲未傾掂點拆呢個政治炸彈，就索性唔開會，費事喺行會成員面前出醜喎！究竟邊個版本至係真？可能只有自詡係「政治家」嘅煲呔曾至知道嘞！