政情：馬雲研雲OS撼喬布斯

智能手機同雲計算已被公認係IT產業嘅未來，正當開發iPhone嘅蘋果公司同開發Android嘅谷歌（Google）鬥個你死我活之際，作為祖國自家人嘅馬雲亦異軍突起，阿里巴巴母公司阿里集團旗下嘅阿里雲計算，尋日就正式公開佢哋嘅秘密武器「阿里雲OS（簡稱雲OS）」移動操作平台，仲發布佢哋同內地廠商合作為聯通設計嘅首款智能手機W700，大有要同兩大巨人較勁嘅味道。

「雲OS」係馬雲力主阿里集團進軍雲計算業務嘅結晶，雖然佢尋日冇亮相，但阿里雲總裁王堅就透露，呢個係研發團隊三年努力開發嘅成果，「雲OS」雖屬自家產品，但亦同時兼容Android應用程式，更重要係「雲OS」已整合包括電郵、搜尋、導航等雲計算服務，而用戶亦會獲100G嘅雲端儲存空間，發展野心確可同喬布斯嘅iCloud媲美。