政情：袁彩雲調理身體恨生兩個
袁彩雲、趙雅芝同鄭文雅尋日齊齊出席「2011-2012年度執行委員會就職記者會暨《文情雅戲》攝影集義賣」，鄭文雅話攝影集已印咗一千本，希望籌到八、九十萬元，佢透露由於內地會作義賣，所以都會加印，下禮拜亦會有相展，將攝影集嘅相攞出嚟義賣。
至於已隨丈夫到加拿大居住近半年嘅袁彩雲就話，之前應曾志偉邀請去日本拍攝，所以向老公請多一個月假返港探親友。問佢有冇努力造人，佢笑言：「順其自然啦！隨緣，不過都好恨，但又唔想畀壓力自己同老公，我哋大家都想要嘅。」佢又話依家有睇中醫同煲湯水調理身體，亦唔抗拒接受人工受孕，更指有得揀嘅話會生一仔一女，但唔會揀懷孖胎，因為風險大。生兩個未夠一隊籃球隊喎，奶奶會唔會收貨？佢話：「打乒乓波得啦！」
袁彩雲（左）同鄭文雅一齊出席攝影集義賣活動。