政情：搞搞政：經濟動力 專業會議 再傳婚訊

不時都傳出經濟動力同專業會議「結婚」組黨，尋日又有消息話，兩幫人已講掂數，將會成立工商黨，由Jefferey林健鋒做主席，「大舊石」石禮謙做副主席。

其實，兩幫人嘅婚訊，兩年前已傳過，但唔知吹乜嘢風，尋日又傳出，但大舊石斬釘截鐵否認其事，佢話同Jeffrey老友鬼鬼成個政圈都知，但唔代表一定要組黨合作，又話自己冇資格做副主席咁高位。聽聞其實雙方幾個月前的確有傾過點樣合作，但部分觀點未有共識。

原來經濟動力早排的確有撩專業會議傾合作，但最近一次已係兩、三個月前，嗰時未發生「梁美芬懲罰選民論」事件，所以依家兩班人係咪仲想合作，定係選擇性合作，就仲未知嘞。