政情：林公公落區搵張建宗壯膽

政府將替補四方案出台諮詢公眾後，政制及內地事務局局長林公公又開始捐窿捐罅推銷，不過，替補方案喺佢手中經歷死撐、跪地再轉軚嘅過程，搞到林公公本來已經冇乜嘅官聲更差，推銷政策能量咁弱，難怪尋晚佢再次落區去工聯會推銷替補建議方案時，勞工及福利局局長張建宗要全程傍到實，孖咇出場，係加強分量定分散風險呢？

林公公尋日去工聯會介紹新嘅諮詢方案，工聯會高層好畀面，坐定定等佢表演，而林公公同張建宗孖咇落區亦罕有地有啲默契，張建宗發言時講到，佢同林公公一齊出現，顯示政府團隊關心呢個議題，會後仲笑笑口話，佢同林公公已經出席過好多次同類諮詢會喎！

夕陽政府官員「大難臨頭各自飛」早已唔係新鮮事，政務司司長唐唐早前已放大假，林公公呢幾日去完立法會又上電台，處處畀人鬧，又同泛民主派撩交嗌，咁難得有張建宗撐，真係點滴在心頭。