政情：郭龍民教招破電話騙徒
好多人都收過自稱「銀行職員」Cold Call電話，推銷個人貸款、信用卡等，其實好多都係不法分子冒充。花旗環球個人銀行服務風險管理部副總裁郭龍民（Ronald）尋日現身教招，嗌市民只要話聲留低「銀行職員」嘅電話，即刻可以驗到真偽。
點解要留低對方電話﹖因為通常騙徒唔會留低有效聯絡方法，佢哋打電話無非想攞市民個人資料，用作入侵戶口，以至冒名申請貸款、服務等，客戶要留低佢電話，騙徒一定縮，但真正嘅銀行職員就唔會怕。
除咗呢招外，佢仲呼籲市民唔好只用一款簽名，事關有物業嘅人，查冊就可以搵到業主簽名筆迹，所以Ronald話市民應考慮唔同情況用唔同簽名。
郭龍民話，市民收到推銷電話時可以要求留低來電者資料，騙徒就無所遁形。