政情：三常秘買樓唔怕冧市

樓價急升，好多人都望樓興嘆，不過政府高官卻不在此列。睇番一眾常任秘書長嘅申報，最少有三個常任秘書長喺過去一年喺本地或外地買樓，有啲仲係買嚟收租添！政府推出遏抑樓市政策，啲高官卻用行動對呢啲政策效用投否定票，真係夠晒諷刺。

素來投資有道嘅教育局常秘黃鴻超，喺鴨脷洲買咗個單位出租，此外仲購入倫敦一個單位五成業權，依家裝修當中，而佢申報嘅物業總數亦由四項增至六項，相當富貴。記得○九年，黃鴻超太太王榮珍以四千四百幾萬元放售中半山愛都大廈單位，勁賺二千幾萬，隨即再大手筆以三千萬買入中半山地利根德閣一個單位，一來一回帳面仍然賺千幾萬，認真和味。

商務及經濟發展局常秘黃灝玄亦不遑多讓，半年前佢買入一個港島區住宅五成業權，同樣用嚟出租，家吓佢喺港島同倫敦各有兩個物業。特首辦常秘麥靖宇就睇好內地，選擇喺廣東省買樓自用。至於負責管理政府財政嘅財經事務及庫務局常秘應耀康，最新申報比舊年冇增冇減，同樣有三個港島區物業，兩個新界區物業，一個就變咗出租，同樣係富貴一族。