政情：網民夾錢請Eva搭高鐵

內地發生7.23高鐵大事故，震驚全球，更令唔少港人反思香港家吓全力起緊嘅高鐵工程，原本反對起高鐵嘅人，關注點亦由當年反對花巨額資金興建唔知成效係咪咁好嘅高鐵，轉為花巨資起條唔安全嘅鐵路出嚟，更有市民大翻運輸及房屋局局長鄭汝樺（Eva）嘅舊帳，質疑佢當年一味唱好，依家應該親身去溫州試搭吓呢啲驚心高鐵，更有網民話明唔介意夾錢請佢去坐高鐵喎！

促向每名市民回水一萬元

記得Eva當年為咗爭取立法會同市民支持高鐵撥款，曾經親身去內地搭過高鐵，事後亦讚不絕口，誇口香港起好高鐵，可以更好咁同內地接軌，對發展彼此經濟、香港融合內地大有幫助。家吓內地高鐵爆單咁大事故，港府高層點睇香港呢條高鐵嘅安全呢？可惜個個變晒鵪鶉！

不過，網民卻唔肯放過佢哋，仲質疑到底Eva當年推銷嘅係「高鐵」定係「動車」，質疑佢嘅誠信。事關溫州和諧號撞車慘劇發生後，內地官方傳媒最初形容係一宗「高鐵」意外，但事隔一晚後，中國鐵路局突然宣稱時速二百五十公里以上嘅列車至可以叫做「高鐵」，今次出事嘅列車時速僅得二百至二百五十公里，只算係「動車」，所以有本港網民質疑，港府一直指高鐵香港段最高速度約為二百公里，根據內地嘅最新定義，呢條根本唔係「高鐵」，而係「動車」。

如果係咁嘅話，當年港府向立法會、甚至全港市民游說嘅高鐵咪不符事實？網民戲謔當年嘅「反高鐵運動」，應該易名為「反動車運動」，或者簡稱「反動」！有網民建議入稟法院控告運輸及房屋局局長鄭汝樺詐騙，要求港府向每名市民回水一萬元；亦有網民建議一人夾一蚊畀Eva返溫州坐高鐵，睇吓佢今時今日點講。