政情：搞搞政：白鴿黨補選失利唔認衰

脫離白鴿黨另立門戶一段日子嘅新民主同盟，最近不斷有成員加入，而且仲有三個係前白鴿黨嘅地區幹事，實力加強唔少，但吸水能力麻麻，就算喺七一遊行都只係籌得四萬蚊，而且係佢哋成副身家。

區選將至，冇咗白鴿黨泵水嘅新民主同盟，選情會唔會每況愈下？任啟邦就話有時唔一定樹大好遮蔭，因為畀雷劈時，企喺樹底反而好易中招畀雷劈死。似乎有弦外之音喎！咁又係嘅，好似前日舉行嘅荃灣區議會福來區補選，工聯會嘅新丁葛兆源成功搶灘，將打算保住議席嘅白鴿黨掃地出門口，咪係例證囉。

白鴿黨主席鐵頭仁尋日話佢哋早料到呢個結果，事關工聯會嘅葛兆源三年前已喺地區做工夫，而白鴿黨根本冇諗過派人參選，只係街坊好想佢哋派人出選，至勉為其難。佢仲話今次落敗同舊年佢哋支持政改方案冇關，始終區選較着重地區議題喎！最後佢仲話唔能夠由補選結果推算年尾區會結果嘅。唔知佢係咪過分樂觀咗啲呢？