政情：郭炳聯推介曾國藩家書
新地連續第四年搞「新地齊讀好書」計劃，贊助二百位九至十四歲嘅基層兒童去參觀書展，每人並獲二百四十元現金津貼買書，而副主席兼董事總經理郭炳聯Raymond親身坐鎮，仲話有本書令佢諗起先父郭德勝添！
原來Raymond最近睇咗兩本好書，其中一本係《曾文正公家書》，即係晚清重臣曾國藩嘅家書，入面提到做人嘅大道理——勤力、節儉、謙虛，佢話同佢先父嘅教導一樣。另一本好書係《箴言精選六十則》，書中提到「每事問」、「忌死頂」、「業精於勤荒於嬉」，令佢覺得除咗可以勉勵學生，連新地員工都啱用，所以好醒目咁大量買入派畀員工。
有小朋友仲問：「Raymond日理萬機，邊有時間讀書？」呢位大老闆就話，最緊要識分配時間，例如瞓唔着或放假就睇多啲書，最重要係可以修身兼成為公司員工嘅好榜樣喎。
郭炳聯（右）鼓勵學生讀好書。