政情：光污染立法邱騰華扮龜

講咗好多年嘅規管光污染問題，環境局局長邱騰華就一味歎慢板，終於好似唧牙膏咁向前踏進一小步。政府尋日公布委任戶外燈光專責小組成員名單，但環團就炮轟當局龜速處理不特止，依家成立專責小組都仲係訂立業務守則試行三年，睇怕最後都好似電影《無間道》話齋，三年又三年。

專責小組主席共十九人，主席係環境諮詢委員會前主席林健枝，成員包括嚟自工程界嘅陳永康、鍾福維；外籍建築師Dr Stefan Al同王紹恒；香港總商會嘅蒲祿祺、中華總商會嘅李德剛、地產建設商會嘅余漢坤、零售業協會嘅張琳，環團則有長春社主席林乾禮同地球之友嘅劉祉峰，仲有天文學會楊光宇做代表。專責小組成員任期一年，下月生效。

試行守則三年又三年

政府話非常重視戶外燈光問題，專責小組提供一個平台，因應本地可接受嘅適當照明度，制訂技術標準及有關補充參數，並加強公眾宣傳及教育，參考國際經驗建議未來路向。

諗番轉頭，社會最熱烈談論光污染問題，原來已經要數番到○八年，當時唔少環保團體包括地球之友係咁推動政府立法規管，當時仲記得煲呔曾言之鑿鑿話會考慮立法，殊不知一等原來就等咗三年。

地球之友環境事務經理朱漢強話，睇番政府其他環保政策，都清楚拖字訣係政府嘅作風，依家成立專責小組行前一步固然好事，但最大鑊係小組主要係訂立業務守則，試三年先再諗下係咪立法，係咪等於放生啲光污染招牌，唔通到時先去拆？

佢又話專責小組好似唔見啲同公眾衞生有關嘅代表，反映下光污染對人眼睛、身心影響，但無論如何佢最希望啲代表明白燈光係要照應該照嘅地方，好似街燈對住街，廣告燈照廣告，咪下下照住人，只會造成滋擾。