政情：搞搞政：高永文妙手仁心拒做官

好多人都話香港缺乏公共行政人才，曾經做過醫管局高層嘅高永文醫生夠知名度，又有行政經驗，耐唔耐就被傳會入政府或重做公職。不過，高醫生尋日以防癌會身份出席一個電台節目時，就閂晒後門，話無意入官門，事關自己都試過出出入入，發覺個性唔適合做公職人員，似乎烏紗帽同佢無緣。

高醫生尋日憶述沙士期間，曾經頂更睇住醫管局工作，呢次經驗卻令佢大叫怕怕，事關佢管理財政唔係咁決斷，自言比較關心基層需要，如果要佢爭取改善服務就鍾意，但如果要佢削減資源而令質素下降，做到大家都壓力大嘅話，佢就唔忍心喎。所以後來醫管局請行政總裁，佢都唔想做，寧願直接為病人服務，撥時間做義工仲開心。佢話，擔心自己做政治決策唔夠班，唔想令支持者失望，官場生涯真係唔會諗。近期各路疑似特首候選人動作多多，又傳組織競選團隊，仲有傳聞話高醫生會幫其中一名疑似特首候選人助選添，無心官場嘅高醫生話明唔會，大家收到啦。