政情:丁磊「不務正業」搞沖印服務
內地近年網絡發展神速,網絡公司嘅規模迅速壯大之餘,業務都愈來愈廣。網易嘅行政總裁丁磊日前現身杭州,就係高調宣布要進軍照片沖印服務,網易近年做嘅瓣數好多,難怪丁磊被內地傳媒形容為「不務正業」。
丁磊解釋佢哋之所以進軍照片沖印業務,係睇好數碼設備普及,而中國每年都會銷售五百萬部數碼相機,為顧客沖印照片大有可為。計埋今次擴充業務,丁磊涉足嘅生意已經有養豬、養雞、紅酒酒莊同瓷器工廠等,真係少啲魄力同財力都唔掂。
被指為不務正業嘅丁磊對呢個說法唔多上心,佢仲解釋,紅酒酒莊業務純粹係佢個人興趣,唔喺網易嘅業務版圖之內喎。