政情：公文袋禍港區選冇運行

年底嘅區議會選舉係政圈大事，各大黨都做緊部署，動輒都派過百人參選，有大狀黨之稱嘅公文袋都算大手筆，預備派出幾十人參選。不過，呢場選戰，公文袋都唔易打，事關近期幾宗矚目官司都被人指同公文袋有關，遠嘅有港珠澳大橋環評官司，近嘅有外傭居留權，尋日就有二十幾個市民走去公文袋總部踩場抗議，大鬧「公民黨禍港」，睇嚟黨魁梁家傑真係有排接招。

尋日去踩場嘅係網上組織「愛護香港力量」，話要抗議身兼該黨高層嘅大狀幫外傭打官司，召集人王先生話：「若外傭擁有居港權，對醫療、教育、房屋、就業造成很大損害。 」而且十多萬外傭到時可以申請家人來港，咁樣香港人口隨時多出幾十萬，壓力好大。

外傭居權環評覆核惹狙擊

尋日係周末，公文袋總部無人辦公，「愛護香港力量」成員喺門外嗌口號後，又對該黨行動表示極度遺憾，要求該黨交代立場，是否支持外傭擁有居港權，然後將抗議信放喺門外就離開。公文袋早兩日先發表聲明，指創黨以來冇參與任何訴訟，而黨員各有不同職業，黨員在履行其職業上的責任時，與該黨無任何關連，該黨亦不會干預黨員工作。

不過，王先生就反駁呢個說法，話該黨有份參與港珠澳大橋環評報告司法覆核，質疑該黨侮辱市民智力及常識判斷能力。

呢兩宗官司都牽動香港人神經，早前港珠澳大橋官司，政府都話已經搞到七十幾宗工程進度減慢甚至停低，依家外傭官司又惹起無數家庭神經緊張，區選期間，公文袋嘅競爭對手一定會發大呢啲事件進行狙擊。