政情：煲呔曾又演無間道？
年尾就係區議會選舉，政府尋日公布替補機制諮詢方案，建制派一睇就傻咗，政府好似又一次喺關鍵時刻為建制派添煩添亂，事關四個方案都太爛，搞到政圈對煲呔曾係政壇無間道嘅猜疑加多兩分。
依家距離區選只有四個月，政府出嘅方案卻熟口熟面，毫無誠意，白鴿黨李永達尋日就講到明，泛民會喺九月區選報名嘅時候，正式向支持替補機制嘅建制派開戰，首先一百二十五個泛民區選候選人，會喺自己嗰區擺擂台陣，邀請建制派區議員辯論。
而且建制派最驚煲呔曾十月發表最後一份施政報告再「終極無間」，整啲「超錯」政策出嚟，等同送個炸彈畀建制派，如果係咁真係凶多吉少。