政情：怪醫中秋追月做老襯

立法會又有喜事喇！有「怪醫」之稱嘅立法會醫學界議員梁家騮傳喜訊，中秋追月夜將結束王老五生涯，同拍咗拖四個月、曾經擔任佢助理嘅公關女友Cannas拉埋天窗，一於人月兩圓。

當晚佢哋會喺尖沙咀洲際酒店筵開四十席，招待親友同議員，早幾日怪醫仲同未婚妻去咗澳門影結婚相添。

雖然做咗幾年議員嘅怪醫見過唔少大場面，但係提起終身大事，怪醫都好怕醜，唔肯透露點樣同女友撻着，至於造人計劃，佢嘅答案更加怪，話依家好難搵醫院床位，遲啲先算喎。

不過，呢對新人仲未搵新愛巢外，連伴郎都虛位以待，因為怪醫好多同學好友都結晒婚。新娘子Cannas就話，兄弟團差唔多組成，都係怪醫嘅中大同學，而且都係名醫，包括李德成、榮潤國、李永康等，而姊妹團成員就係Cannas嘅朋友及昔日嘅記者好友，大部分都美貌與智慧兼備。至於度蜜月，Cannas就話會推遲到今年底先出發，所以目的地就遲一步先至諗喎！