政情：搞搞政：人肉錄音機用到殘

替補機制一役，搞到政制及內地事務局局長林瑞麟整個殘晒，由死撐唔讓步、到一再退讓，最後更押後方案諮詢兩個月，佢亦成為政黨政團、甚至建制派議員針對嘅對象，尋日林公公死死氣拎出四個方案去立法會介紹，雖然佢再次發揮人肉錄音機嘅功能，但喺議員狂射下都難免重傷。

攞大假避風頭

林公公介紹完了無新意嘅方案後，議員都好唔滿意，唔少批評都係針對佢個人嘅，職工盟嘅李卓人就炮轟佢手法好鬼祟，法律界嘅議員都係睇死佢將來要面對司法覆核嘅挑戰，更有建制派議員質疑替補機制推得咁差，同佢個人能力有關。林公公最叻就係重複對白，將設定對白一而再、再而三咁重複，尋日咁多提問針對個人，佢都明顯左支右絀，好難招架。

七一以嚟，佢就成為各大政黨遊行洩憤嘅目標，甚至喺立法會外公然畀人「閹割」，身殘體傷到呢個地步，難怪林公公都要攞假避風頭，今個月二十七日起放假到下月八日，療吓傷都要o架！