SUN世代：升呢散戶導師避過海嘯

「單靠打工，根本無辦法創造財富！」本着這個信念，梁帥聰（Clement）在公餘時積極增進財經知識及投資技巧。憑着累積的經驗及獨到眼光，他於投資路上取得輝煌佳績：經歷金融海嘯後全身而退、投資達到逾百分百回報、物業投資升值近三倍等。這位投資專家，更創立「投資策略研究中心」，教授投資技巧，他笑言：「其實似社會服務多過做生意，希望可以培訓散戶嘅投資智慧，協助佢哋有效做到資產增值！」

梁帥聰於香港大學攻讀工商管理學系，畢業後曾於跨國電訊及軟件開發機構任職，負責銷售業務。直至○三年，他遇上事業轉捩點：「當時目擊一啲四十歲以上嘅同事，突然畀人炒咗，失去工作，令我萌起居安思危嘅感覺，亦深感單靠打工，根本無辦法創造財富，於是決定開拓自己嘅投資路。」

「冇人一出世就識得買股票！」Clement深信惟有努力才能成功。他於公餘時間努力學習，增進財經知識及技術分析技巧，多年的努力最終換來卓越投資表現，最近兩年其投資回報超過百分百，而物業投資亦於八年內升值近三倍。

傳授技巧 勝過送魚獲

多年的投資生涯中，最令Clement印象深刻的，是金融海嘯的經歷：「○八年頭有直覺，覺得個巿有啲唔妥，可以用『聞到味』嚟形容，於是即刻賣晒手頭上嘅貨，之後只係用十分一嘅資金做短炒獲利，最後經過金融海嘯衝擊後，完全冇損失，好有成功感！」

○九年，這位投資專家萌生創業念頭：「以前參加過好多投資課程，覺得每個課程都各自有好嘅地方，我就諗，點解唔可以有一個comprehensive（全面）嘅課程，涵蓋晒所有好處？」於是，Clement與數名年輕的資深投資者創立「投資策略研究中心」，除了向散戶教授投資知識與技巧外，亦糾正錯誤的投資心態。

以釣魚作比喻，Clement不會把魚獲送給學員，而是傳授釣魚技巧，令他們靠自己創造財富：「好多散戶去上投資課程，只係想拎幾個numbers去買貨，但咁樣只係幫到佢哋一次。我期望可以教育知識同技巧外，亦向佢哋灌輸正確心態，幫助佢哋喺投資路上自食其力，做到有效資產增值！」

Clement's Profile

婚姻狀況：已婚

學 歷：香港大學工商管理學士

現 職：實德財富管理有限公司聯席總監、FCI投資課程總監