政情：百麗鞋購網嫡系掌舵

鞋業巨匠百麗同百度聯手入股內地網站優購網，搞鞋類購物網，早有所聞，但投資金額原來唔止二十億人仔，內地有報道指投資規模可能達三十億人仔。雖然唔多清楚兩位金主嘅注資比例，估計要到八月先有結果，但係百麗今次肯冒咁大風險，皆因有熟人護航。聽講，優購網嘅幕後揸fit人，原來係百麗「嫡系」人物，即係百麗國際集團前副總裁張學軍，佢家陣出任網站最高領導人CEO一職，但只係今年四月嘅事，睇嚟百麗嘅投資大計一早有預謀。咁又係，百麗其實早喺○八年，已經成立過官方購物網淘秀網，但淘秀網嘅銷售額佔集團比例唔多，所以今個月初先透過優購網，正式進軍B2C嘅鞋類網購市場。

今次百麗識得搵百度合資出擊，陪住壯膽之餘，實際操作時又少一份擔心，計落呢次可能係百麗電子商貿翻身之作，分分鐘可以追趕由騰訊注資支持嘅鞋品網絡商城好樂買。