政情：卿姐唱紅歌金勞詹捐15萬
早幾日立法會搞惜別舊大樓晚宴，有出席晚宴嘅人士透露，白鴿黨副主席劉慧卿當晚拉埋另外五個黨友上台唱歌，當時大家都滿腹狐疑，點解一直唔肯開金口嘅卿姐肯唱歌呢？原來，出名豪爽嘅金融服務界議員「金勞詹」詹培忠見大家玩得高興，即席開出盤口，話只要卿姐肯唱歌，佢會捐出十萬蚊畀白鴿黨做經費咁話。難得金主自動送上門，卿姐自然義不容辭啦。
據聞佢哋一行六人唱咗首《我是中國人》，由於太好聽，在場人士拍爛手掌，金勞詹即時加碼，一共捐出十五萬元畀民主黨添。十五萬元對金勞詹嚟講實在濕濕碎，最特別反而係卿姐唱埋呢啲愛國歌曲，唔通真係印證外間所言，白鴿黨喺舊年支持政改方案後已經轉型做愛國愛港建制派政黨？抑或只係想攞番張回鄉卡呢？