政情：周國豐做窮人嘆學歷重要

名人周啟邦之子Brandon周國豐身為大律師，早前參加咗港台節目《窮富翁大作戰》，體驗每日只可以用五十蚊嘅窮人生活，又要做速遞員同珍珠奶茶店店員呢啲基層工作，雖然只係短短四日，但佢都忍唔住大呻辛苦，仲慨嘆︰「冇學歷喺香港真係好難生存。」

Brandon尋日同一眾80後、90後分享做窮富翁嘅生活體驗，仲話親身體驗過窮人生活後，依家就同一個社福機構搞緊獎學金同師友計劃，諗住幫年輕人讀書同搵工咁話喎。

立法會資訊科技界議員「IT豪」譚偉豪都有出席活動，談到低學歷、低收入嘅年輕人係咪注定冇出頭天，佢話︰「唔同時代都有唔同困難，以前香港靠工業，依家香港冇，鄰近深圳有。」佢又話深圳好多年輕人冇讀過大學都滿懷理想，點解香港年輕人唔可以。呢番言論隨即被一名中學生寸爆︰「咪即係喺香港冇出路囉，你估返大陸發展咁容易咩！」搞到IT豪面懵懵。