政情：搞搞政：鼠王芬鬧爆網民望破底

專業會議嘅立法會議員「鼠王芬」梁美芬早前發表「懲罰選民論」後，畀網民鬧爆兼狂翻舊帳，雖然佢喺網上紅爆，但人氣反而好似玩跳樓機咁「急跌」，得分仲係上任以來新低添！

香港研究協會今個月十一至十八日用電話隨機調查，成功訪問咗一千四百五十個十八歲以上市民，就各地區直選立法會議員評分，最低係一分、最高六分。調查發現，鼠王芬得分大幅下跌零點三八分，係眾直選議員之冠，僅得二點二六分，喺三十位直選議員中排尾二，喺九龍西五位議員中更加係包尾，比排第一嘅民協馮檢基差足足零點八三分。

調查同時發現有六成直選議員得分都下跌，只不過鼠王芬成績過分突出，好似公文袋黨魁袋巾傑咁，得分亦都跌咗啲；建仔嘅陳鑑林同李慧琼得分亦都分別下跌咗零點二九同零點二四，分別得二點三八分同二點五七分，簡而言之，上述幾位建制派議員得分都唔合格。

研究機構就指出，調查結果反映大部分議員近兩個月嘅工作表現都未符市民期望，相信同最近嘅替補機制爭議有關，呼籲各位尊貴嘅立法會議員，以理性務實態度問政。